Together for Lifelong Learning – nordisk samarbeid for livslang læring der folk bur

Som avslutning på Erasmus+-prosjektet Together for Lifelong Learning inviterte prosjektpartnarane til ei digital avslutningskonferanse der erfaringar, resultat og læringspunkt frå prosjektperioden vart delte og diskuterte. Konferansen samla studiesenter, utdanningsinstitusjonar, beslutningstakarar og andre aktørar med interesse for livslang læring og desentralisert utdanning.

Prosjektet har vore eit Erasmus+ småskalapartnarskap (KA210) og har samla StudieHub – Fjordane Studiesenter, Campus Värnamo og Holbæk Uddannelses- og Studiecenter (HUSC). Felles for partnarane er ønsket om å styrkje tilgangen til utdanning for vaksne som bur i distrikts- og regionområde.

Bakgrunnen for samarbeidet er felles nordiske utfordringar. Mange vaksne har avgrensa moglegheit til kompetanseheving på grunn av lange avstandar, lite fleksible utdanningstilbod og manglande lokale støttestrukturar. Gjennom prosjektet har partnarane utforska korleis studiesenter kan fungere som strategiske knutepunkt for fleksibel, inkluderande og desentralisert utdanning.

I avslutningskonferansen vart det lagt til rette for felles refleksjon rundt kva prosjektet har bidrege med, og kva som bør takast vidare. Gjennom korte presentasjonar, videoklipp og dialogbaserte bolkar delte partnarane erfaringar knytt til:

• samarbeid på tvers av land

• digitale og hybride arbeidsformer

• studentperspektivet

• studiesentera si rolle i regionale kompetansesystem

Eit sentralt tema i diskusjonane var korleis studiesenter kan fungere som strategisk infrastruktur for livslang læring – ikkje berre som lokale tilbod, men som bindeledd mellom kommunar, regionar, utdanningstilbydarar og arbeidsliv. Finansiering og styring vart òg løfta fram som avgjerande faktorar for å sikre berekraftige løysingar over tid.

Prosjektet har bestått av både digitale og fysiske møte, tematiske webinar, studiebesøk og nordiske konferansar. Eit særleg høgdepunkt var den nordiske konferansen om livslang læring i Bergen, der over 160 deltakarar frå Norden og Skottland deltok. I tillegg har ei digital minikonferanse om finansiering og styring av studiesenter bidrege til auka kunnskap om berekraftige modellar.

Samarbeidet med University of the Highlands and Islands i Skottland har gitt verdifulle europeiske perspektiv på desentralisert høgare utdanning, og vist korleis internasjonal erfaringsutveksling kan bidra til betre lokale løysingar.

Sjølv om prosjektperioden no er formelt avslutta, markerer avslutningskonferansen starten på ein ny fase. Partnarane er samde om å vidareføre samarbeidet gjennom nordiske nettverk. StudieHub – Fjordane Studiesenter og Campus Värnamo vil arbeide vidare med eit nytt Erasmus+ samarbeidsprosjekt (KA220), der målet er å utvikle og teste berekraftige nasjonale modellar for studiesenter. Partnarskapet vert utvida med nye deltakarar frå Noreg, Sverige og Island.

Prosjektet har vist at nordisk og europeisk samarbeid gir stor meirverdi – både for institusjonane, for beslutningstakarar og for vaksne som treng tilgang til utdanning der dei bur.

Opptak frå arrangementa er tilgjengelege på prosjektet si nettside: www.nordicstudycenters.org