God start på helseleiarutdanninga i Nordfjord - våren 2026!

Tysdag og onsdag denne veka gjennomførte Universtitetet i Innlandet, Ambia og StudieHub – Fjordane Studiesenter første samling i emne 1 i helseleiarutdanninga, Leiing av myndiggjorte medarbeidarar og utvikling av personlege leiarferdigheiter. Samlinga samla 36 deltakarar frå kommunane Gloppen, Stad, Stryn, Bremanger og Kinn, og markerer starten på eit omfattande og praksisnært kompetanseløft for leiarar i helse- og omsorgstenestene i regionen.

Emnet er på 7,5 studiepoeng og er ein del av årsstudiet i leiarutdanning innan helse- og omsorgstenesta ved Universitetet i Innlandet. Førelesar Jim Skarli frå Universitetet i Innlandet leia samlinga og gav deltakarane to innhaldsrike og varierte dagar. Undervisninga tok mellom anna for seg:

• relasjonell, myndiggjørande og tillitsbasert leiing

• situasjonsbestemt leiing og coachande kommunikasjon

• sjølvleiing hos både leiar og medarbeidar

• makt, tillit og godt medarbeidarskap

• utvikling av personlege leiarferdigheiter og eigen leiarrolle

Det vart lagt stor vekt på refleksjon, dialog, erfaringsutveksling og praktisk trening, slik at deltakarane kunne knyte teori tett opp mot eigen leiarpraksis.

I tillegg deltok Anja Tjelflaat frå Ambia, som støtta deltakarane i praktiske oppgåver knytt til bruk av Canva. 

Som ein del av tilrettelegginga frå StudieHub – Fjordane Studiesenter er alle deltakarane også inviterte til ein Zotero-workshop. Workshopen skal gjere det enklare å arbeide med kjelder og sitering i akademiske tekstar, og er meint som ei praktisk støtte i arbeidet med oppgåver og vidare studium.

Neste samling byggjer vidare på arbeidet frå første samling, og deltakarane skal mellom samlingane jobbe med heimeoppgåver i basisgrupper.