Frå kjøkkenbord til digitalt klasserom på Nordfjordeid

Den første undervisningsdagen samla seks studentar frå Stad kommune, ein frå Gloppen og ein frå Hornindal seg i lokala til StudieHub på Nordfjordeid. Tre medstudentar deltok frå eit tilsvarande hybridrom i Årdal, medan læraren underviste frå Førde.

Studentane tek Elkraft-utdanning ved Fagskulen Vestland. Hybridløysinga gjer det mogleg å følgje undervisninga lokalt, utan å måtte reise til Førde på kvar undervisningsdag eller sitje åleine heime framfor kvar sin skjerm.

Eit digitalt klasserom med lokal tilhøyrsle

Hybridrommet er utforma for undervisning på tvers av geografiske avstandar. Studentane sit i ein sirkel rundt fire skjermar og kan sjå kvarandre samtidig som dei ser læraren og medstudentane ved andre læringsstader.

Midt i rommet står eit kamera- og mikrofonsystem med fire linser som gir 360-graders oversikt. Det gjer at læraren kan sjå alle som deltek, uavhengig av kvar dei sit rundt bordet.

Løysinga skil seg frå eit tradisjonelt møterom, der deltakarane ofte må velje mellom å rette merksemda mot skjermen og å ha kontakt med dei andre i rommet.

– Vi ønskjer å vere eit supplement der studentane kan sitje saman, og ikkje åleine kvar for seg ved kjøkkenbordet. Vi trur ein lærer meir når ein får møtast, diskutere fag og vere del av eit lokalt fellesskap, seier Kari Eldby Rygg, leiar for StudieHub – Fjordane Studiesenter.

Studentane Tore Solheim og Daniel Vindfjell fortalde etter den første undervisningsdagen at teknologien hadde fungert godt, og at det var betre å følgje undervisninga saman ved studiesenteret enn å sitje kvar for seg heime.

Tor Muldsfjord, som blei intervjua av NRK under undervisninga, trekte også fram verdien av å vere samla:

– Eg synest det er veldig kjekt å kunne vere i eit klasserom, på ein måte eit digitalt klasserom. Då har vi kunnskapen rundt heile bordet og kan diskutere noko vi ikkje kunne fått gjort dersom vi sat heime, sa Muldsfjord til NRK.

Ideen kom frå Campus Värnamo

StudieHub blei kjent med denne typen læringsrom under jobbskygging ved Campus Värnamo i Sverige. Besøket var ein del av internasjonalt samarbeid gjennom Erasmus+, og representantar frå Fagskulen Vestland var med og fekk sjå korleis teknologien kunne nyttast pedagogisk.

StudieHub hadde ikkje finansiering til å kjøpe inn ei slik løysing åleine. Fagskulen Vestland fann midlar og kjøpte inn utstyr til to hybridrom, eitt på Nordfjordeid og eitt i Årdal.

Romma er etablerte gjennom eit samarbeid mellom Fagskulen Vestland, StudieHub – Fjordane Studiesenter og Sogn Kompetanse. Etter det samarbeidspartnarane kjenner til, er dette første gong denne typen romløysing blir teken i bruk i desentralisert fagskuleundervisning i Noreg.

– Dette viser kor viktig det er å hente kunnskap utanfrå og utvikle løysingar saman. Vi tok med oss erfaringar frå Campus Värnamo, og Fagskulen Vestland såg moglegheitene og gjorde det mogleg å realisere løysinga i Vestland, seier Rygg.

Kan opne for fleire utdanningar

I første omgang blir hybridromma brukte i Elkraft-utdanninga ved Fagskulen Vestland. Erfaringane kan likevel bli relevante for fleire utdanningar og fagområde.

StudieHub tilbyr ikkje utdanningane sjølv. Rolla vår er å vere ein lokal fasilitator som stiller med lokale, teknologi, oppfølging og ein møteplass for studentane. For å gjere fleire utdanningar tilgjengelege i regionen er vi avhengige av tett samarbeid med universitet, høgskular og fagskular.

– Vi håpar at fleire utdanningsinstitusjonar vil sjå kva som er mogleg. Teknologien er ikkje eit mål i seg sjølv, men eit verkemiddel for å gi studentane eit betre læringsmiljø og gjere utdanning tilgjengeleg for fleire, seier Rygg.

Når hybridrommet ikkje er i bruk til undervisning, kan løysinga også nyttast til møte, kurs og samarbeid mellom deltakarar på fleire stader.

Vil de utforske moglegheitene?

Er de ein utdanningsinstitusjon som ønskjer å utforske korleis desentralisert undervisning kan kombinerast med lokale læringsfellesskap?

Ta gjerne kontakt med oss for meir informasjon eller for å avtale eit besøk.

Sjå og høyr meir

NRK:
https://radio.nrk.no/serie/distriktsprogram-sogn-og-fjordane/DKSF01018226?utm_source=nrkradio&utm_medium=delelenke-ios&utm_content=prf:DKSF01018226#t=1h30m12s

Fjordenes Tidende:

https://www.fjt.no/nyheter/n/PdQvGR/paa-plass-ved-den-nye-utdanninga

Fjordabladet:
https://www.fjordabladet.no/nyhende/n/Ex8j2A/ny-maate-aa-laere-paa

Kontakt

Kari Eldby Rygg
Leiar, StudieHub – Fjordane Studiesenter
Telefon: 952 87 575
E-post: kari@inviro.no