Nye nettbaserte masteremne om menneske og KI i samspel

Kort om utdanninga

Namn på utdanninga/emna:
Menneske og KI i samspill: systemer, dataanalyse og læring

Tilbydar:
Universitetet i Bergen og Centre for the Science of Learning and Technology (SLATE)

Studiepoeng:
Tre emne à 5 studiepoeng

Nivå:
Masternivå

Format:
100 prosent nettbasert undervisning

Undervisningsspråk:
Engelsk

Varigheit:
Kvart emne går over om lag 6 veker

Studieavgift:
Kr 8 500 per emne

Semesteravgift:
Kr 650 per semester

Plassar:
50 plassar per emne

Søknadsfrist:
Løpande opptak fram mot studiestart, så lenge det er ledige plassar

Oppstart:
Første emne startar 1. september 2026

Om emna

Kunstig intelligens er teknologi som påverkar stadig fleire delar av arbeidsliv, utdanning og samfunn. Universitetet i Bergen og Centre for the Science of Learning and Technology (SLATE) utviklar no ei ny rekke vidareutdanningsemne som ser nærare på korleis menneske og KI samhandlar i ulike kontekstar.

Emna er tverrfaglege og skal gi kunnskap om korleis samspel mellom menneske og KI kan støtte læring, kunnskapsbygging, kreativitet og beslutningstaking. Dei tek òg opp etisk, berekraftig og ansvarleg utvikling av hybride system mellom menneske og teknologi.

Dei tre første emna går hausten 2026. Du kan søkje på eitt eller fleire emne, og du søkjer plass på kvart emne for seg. Det er ikkje nødvendig å ta det første emnet for å kunne ta dei andre.

Tre emne hausten 2026

HAIS660 Introduksjon til menneske-KI systemer

Dette emnet gir ei tverrfagleg innføring i moglegheiter, utfordringar og risikoar knytte til menneske-KI-system. Målet er å gi ei informert og kritisk forståing av korleis KI-teknologi kan støtte læring, arbeid og demokratisk deltaking i samfunnet.

Oppstart: Tysdag 1. september 2026
Obligatoriske digitale førelesingar: 1. september, 22. september og 13. oktober
Tidspunkt: Kl. 18.30–20.00
Eksamen: Munnleg eksamen 27. oktober

HAIS662 KI for læring

Dette emnet gir avansert kunnskap om bruk av kunstig intelligens i læringssamanhengar, til dømes i utdanning, arbeidsliv og kvardagsmiljø. Emnet tek føre seg historiske, teoretiske, praktiske og evaluerande perspektiv, og ser på design, utvikling, evaluering og implementering av KI for læring.

Emnet ligg i skjeringspunktet mellom teknologi, menneske–datamaskin-interaksjon, utdanning, psykologi, filosofi, sosiologi og jus.

Oppstart: Måndag 28. september 2026
Obligatoriske digitale førelesingar: 28. september, 19. oktober og 9. november
Tidspunkt: Kl. 18.30–20.00
Eksamen: Innlevering av eksamensmappe, frist 23. november

HAIS665 Dataanalyse

Dette emnet gir kunnskap og ferdigheiter i å bruke data frå digitale miljø for å støtte utvikling og beslutningsprosessar i organisasjonar. Deltakarane får arbeide med dataanalysemetodar, datautvinningsteknikkar, prediktive metodar og KI-modelleringsmetodar for å analysere og tolke datasett.

Oppstart: Tysdag 20. oktober 2026
Obligatoriske digitale førelesingar: 20. oktober, 10. november og 1. desember
Tidspunkt: Kl. 18.30–20.00
Eksamen: Innlevering av eksamensmappe, frist 18. desember

Kven passar emna for?

Emna passar for deg som ønskjer meir innsikt i korleis kunstig intelligens kan påverke læring, arbeid, samarbeid og beslutningstaking. Dei kan vere aktuelle for personar i arbeidslivet som ønskjer fagleg påfyll på masternivå, og for fagpersonar som vil forstå meir av samanhengen mellom menneske, teknologi, data og læring.

Sidan undervisninga er 100 prosent nettbasert og går på deltid, kan emna vere aktuelle for deg som vil kombinere vidareutdanning med jobb.

Relevans for regionen

For arbeidsliv, kommunar og fagmiljø i Nordfjord og Sunnfjord er digital kompetanse og forståing av KI stadig meir relevant. Desse emna gir høve til å byggje kompetanse utan å måtte reise vekk frå regionen.

StudieHub – Fjordane Studiesenter arbeider for å gjere høgare utdanning og kompetanseheving meir tilgjengeleg lokalt. Når utdanningar kan takast nettbasert, kan fleire delta frå der dei bur og arbeider. StudieHub kan vere ein lokal støttespelar for studentar som ønskjer å kombinere digitale studium med lokale møteplassar, læringsfellesskap og leseplass i Studentstovene.

Slik søkjer du

Du søkjer plass på kvart emne for seg:

• HAIS660 Introduksjon til menneske-KI systemer
• HAIS662 KI for læring
• HAIS665 Dataanalyse

Det er løpande opptak fram mot studiestart, så lenge det er ledige plassar.

Har du spørsmål om søknad, dokumentasjon, søknadsfristar eller status for søknaden, kan du kontakte UiB Videre på telefon 55 58 20 40 eller e-post videre@uib.no.