Tilbyr utdanning med full løn

Tilsette i industrien får no eit kraftig løft for kompetansepåfyll. Gjennom Industriens kompetansefond kan bedrifter som er omfatta av Industriovereinskomsten søkje om lønsrefusjon, slik at medarbeidarar kan ta korte utdanningar utan å tape inntekt. Ordninga startar med ein forpilot hausten 2025.

Regjeringa har løyvd 100 millionar kroner til fondet. I piloten er det laga ein avgrensa kurskatalog med tolv utvalde fagskuletilbod som blir dekka av fondet. Fagskulen Vestland tilbyr desse fire studia i haust:

• Skreddarsydde KI-system (nettbasert)

• Elektronikkutvikling (nettbasert med éi samling i Førde)

• Moderne måleteknikk (nettbasert med éi samling i Førde)

• Robotteknologi (samlingsbasert Bergen/Stord)

Målet med Industriens kompetansefond er å få fleire tilsette til å gjennomføre bransjerelevant etter- og vidareutdanning, slik at norsk industri kan halde oppe og styrkje konkurransekrafta. Fondet er eit trepartssamarbeid mellom Fellesforbundet, Norsk Industri og staten.

— Vi trur at dette vil føre til at det blir enklare for mange bedrifter å gi fagarbeidarane sine ei kompetanseutviding, seier Eilert Årseth, prorektor for utdanning ved Fagskulen Vestland.

Slik kjem du i gang:
Ta kontakt med arbeidsgjevaren din for å avklare om verksemda er omfatta av Industriovereinskomsten og kan søkje om lønsrefusjon. StudieHub – Fjordane Studiesenter hjelper gjerne med informasjon om tilboda, praktiske avklaringar og påmelding.