Ta nettbaserte mikroemne om klima, miljø og energi

Kort om utdanninga

• Namn på utdanninga/emnet: Klima, miljø og energi – mikroemne på nett
• Tilbydar: Universitetet i Bergen
• Studiepoeng: 2,5 studiepoeng per emne
• Nivå: Bachelornivå
• Krav til studierett: Ope for alle
• Krav til forkunnskap: Ingen tidlegare utdanning eller faglege forkunnskapar
• Format: 100 % nettbasert undervisning
• Studiestad: Nettbasert, via UiB si læringsplattform Mitt UiB
• Varigheit: Deltid over 10–12 veker per emne
• Søknadsfrist: Løpande påmelding så lenge det er ledige plassar
• Oppstart: Dei to første emna startar hausten 2026
• Kostnad: Ingen studieavgift. Semesteravgift kr 650 per semester
• Tal studieplassar: 100 studieplassar per emne

Universitetet i Bergen utviklar ei rekkje med seks små, nettbaserte emne om klima, miljø og energi. Emna tek opp tema som berekraft, klima, energiomstilling, livet i havet og livet på land i eit berekraftsperspektiv.

Kvart emne er på 2,5 studiepoeng, og du kan ta eitt eller fleire emne uavhengig av kvarandre. Emna er lagde opp slik at dei kan kombinerast med jobb, familie og andre kvardagsplikter.

Dei to første emna startar hausten 2026:

FRAM620 Berekraft i praksis - forståing, handling og endring
Emnet går frå august til oktober 2026. Her får du grunnleggjande kunnskap om berekraftsomgrepet, historikken bak berekraftig utvikling og korleis dette har påverka politikk og forvaltning nasjonalt og internasjonalt. Emnet tek også opp kritiske perspektiv, kjeldebruk, dis- og misinformasjon, FNs berekraftsmål og klima, miljø og energi i eit berekraftsperspektiv.

FRAM623 Klima - berekraft, konsekvensar og løysingar
Emnet går frå oktober til desember 2026. Her lærer du om grunnleggjande mekanismar bak drivhuseffekten, menneskeskapte utslepp, klimaendringar, klima- og berekraftsrisiko og korleis klima og berekraft heng saman med samfunnsval, internasjonale rammeverk og FNs berekraftsmål.

Undervisninga er fleksibel og i hovudsak asynkron. Det betyr at du i stor grad kan arbeide med lærestoff, videoar, oppgåver og digitale læringsaktivitetar når det passar deg. Du får tilgang til ei eiga emneside i Mitt UiB, der du finn lærestoff, videoar, quizar, oppgåver og informasjon frå faglærar.

Vurderingsforma er mappevurdering. Det vil seie at du leverer oppgåver og quizar undervegs. Når alle oppgåver og quizar er leverte og godkjende, er emnet bestått.

Emna passar for alle som ønskjer meir kunnskap om klima, miljø, energi og grøn omstilling. Det kan vere aktuelt for deg som arbeider i små og mellomstore bedrifter, grøne hubbar, olje- og gassindustrien, fornybarnæringa, offentleg sektor, forvaltning eller utdanning.

For Nordfjord og Sunnfjord er dette relevant kompetanse i møte med store omstillingar i arbeids- og samfunnsliv. Klima, berekraft og energiomstilling påverkar både næringsliv, kommunar og lokalsamfunn. Små og fleksible emne kan vere ein god måte å byggje ny kompetanse på, utan å måtte ta eit langt studieløp.

StudieHub - Fjordane Studiesenter ønskjer å gjere fleksibel utdanning meir tilgjengeleg i regionen. Sjølv om emna er nettbaserte, kan det vere verdifullt å ha ein lokal stad å studere frå. Gjennom StudieHub kan studentar nytte leseplassar i Studentstovene og bli del av eit lokalt læringsfellesskap der det passar.

Det er ingen studieavgift for emna. Studentar betalar berre semesteravgift til Sammen på 650 kroner per semester. Dersom du tek to emne same semester, betalar du semesteravgifta berre éin gong.

Fleire emne kjem i 2027. Planlagde tema er energiomstilling, blå natur og havets ressursar, balansen mellom bruk og bevaring av natur og berekraftig innovasjon.

Les meir og søk om plass her.