Praksisnær rettleiing i helse- og omsorgstenesta – ny modul på 10 studiepoeng

Ønskjer du å bli tryggare i rettleiarrolla i helse- og omsorgstenesta? Modulen Praksisnær rettleiing i helse- og omsorgstenesta er utvikla for deg som vil styrkje kompetansen din i å rettleie elevar, lærlingar, praksiskandidatar og nye kollegaer i ein travel og krevjande arbeidskvardag.

Utdanninga blir tilbydd av Fagskolen Aldring og helse i samarbeid med Fagskulen Vestland og SIV Studiesentera i Vestland. Kommunane Kinn, Lærdal og Stad har vore med på å forme innhaldet i modulen, slik at han er tett kopla til reelle behov i tenestene.

Modulen gir 10 studiepoeng og kan takast som ein frittståande modul. Innhaldet rettar seg særleg mot rettleiarrolla, metodar og verktøy, profesjonell kommunikasjon, relasjonskompetanse og den vanskelege samtalen. Gjennom konkrete situasjonar frå arbeidshverdagen får studentane verktøy som styrkjer læring, refleksjon, samarbeid og fagleg tryggleik.

Undervisninga er organisert som eit intensivt deltidsløp over inntil 20 veker, med eit samla omfang på om lag 250 timar. Det er venta ein eigeninnsats på om lag 12,5 timar per veke. Opplegget kombinerer sju digitale samlingar på Teams med to fysiske samlingar ved studiestedet. I tillegg arbeider studentane med praksisnær trening i eigen arbeidskvardag, rettleiing undervegs og obligatoriske læringsaktivitetar.

Undervisninga vekslar mellom korte faglege innlegg, rettleiingsøvingar, gruppearbeid, digitale arbeidsformer og refleksjon. Oppgåver blir leverte digitalt, og studentane må difor disponere eigen PC eller Mac.

Dette lærer du

I modulen arbeider studentane mellom anna med:
- rettleiarrolla, ansvar og utvikling
- rettleiing i praksis: prosessar, mål og struktur
- praktisk rettleiing, metodar og verktøy
- profesjonell kommunikasjon, etisk refleksjon og den vanskelege samtalen
- relasjonskompetanse, samhandling og maktbalanse

Etter fullført modul skal studenten kunne planleggje, gjennomføre og evaluere rettleiing tilpassa den som blir rettleidd. Studenten skal også kunne bruke profesjonell kommunikasjon for å fremje læring, refleksjon og meistring, leggje til rette for læringsaktivitetar i praksis og handtere vanskelege samtalar på ein fagleg og etisk forsvarleg måte.

For deg som jobbar i tenesta

Denne modulen passar godt for helsefagarbeidarar som har eller ønskjer ei aktiv rolle i opplæring og rettleiing på arbeidsplassen. Utdanninga er særleg relevant i tenester der det er behov for å ta imot og følgje opp elevar, lærlingar, praksiskandidatar eller nytilsette på ein god måte.

Studiestader og lokale samlingar

Modulen blir tilbydd med oppstart i Bergen i veke 35–51 i 2026, og i Alta og Hønefoss i veke 2–20 i 2027. Samstundes er det opna for desentraliserte løysingar, der samlingsstader kan justerast etter behov, også i regionar nær desentraliserte studiesenter.

For vår region er dette særleg aktuelt: Studiesentera vil kunne tilby dei fysiske samlingane ved sine lokasjonar dersom det blir fem eller fleire deltakarar som ønskjer å ta utdanninga ved studiesenteret. Dette kan gjere det lettare å kombinere utdanning med jobb og familieliv.

Opptakskrav

For opptak krevst fagbrev som helsefagarbeidar og arbeidsforhold i helse- og omsorgstenestene. Søkjarar som skal avleggje fagprøve etter opptaksfristen, kan få tildelt plass på vilkår om bestått prøve. Realkompetanse kan også vurderast for søkjarar som er 23 år eller eldre.

Informasjonsmøte

Det blir halde informasjonsmøte 11. mai kl. 10.00–11.00.
For å få kalenderinvitasjon med Teams-lenkje kan interesserte sende e-post til kari@inviro.no.

Ei utdanning utvikla for praksisfeltet

Modulen er utvikla for å vere relevant, konkret og tett på kvardagen i helse- og omsorgstenestene. Målet er å gi deltakarane tryggleik og verktøy til å støtte læring, meistring og fagleg utvikling hos andre — og samstundes styrkje eiga rolle som rettleiar.

StudieHub legg til rette for deltakarar frå Stryn, Stad, Gloppen, Bremanger, Kinn og Sunnfjord.

Vi tilbyr:

• Lokalt fagleg fellesskap
• Studieplass og teknisk støtte
• Informasjon og oppfølging
• Dialog med arbeidsgivar ved behov

Les meir her.

Meld interesse.